4-июлга оогон түнү Орусиянын Украинага жапырт чабуулу учурунда Польшанын Киевдеги консулдугу да зыян тартты.
«Кечээ Орусиянын жапырт соккусунун кесепети оор болду, өрттөр тутанып, чоң зыян келтирилди. Анын ичинде Киевдеги поляк консулдугу да бар», — деп жазды Х түйүнүнө Польшанын тышкы иштер министри Радослав Сикорский.
«Президент Трамп, Путин сиздин тынчтыкка келүү аракетиңизге шакаба чегип отурат. Украинага зениттик куралдарды берүүнү калыбына келтирип, баскынчыга каршы катаал санкцияларды киргизиңиз», —деп Сикорский АКШ президентине кайрылды.
Орус армиясы түндө Украинага массалык чабуул коюп, 550дөн ашуун ракета жана дрон менен аткылады. 539 учкучсуз учактын 330у Shahed дрондору, бирөө Х-47М2 "Кинжал" аэробаллистикалык ракета, алтоо баллистикалык "Искандер-М/KN-23" жана "Искандер-К" канаттуу ракетасы экенин Украинанын Куралдуу күчтөрү билдирди.
Украин президенти Владимир Зеленский негизинен бутага Киев алынганын айтты.
4-июлга караган түнү Орусиянын армиясы Украинага жапырт чабуул коюп, жалпы 550дөн ашуун ракета жана дрон менен аткылашты. 539 учкучсуз учактын 330у Shahed дрондору, бирөө Х-47М2 "Кинжал" аэробаллистикалык ракета, алты баллистикалык "Искандер-М/KN-23" жана "Искандер-К" канаттуу ракетасы.
Бул тууралуу Украина Куралдуу күчтөрүнүн абадан коргонуу командачылыгы билдирди.
"Негизги бутага Киев алынды. Эл жыш жашаган сегиз аймакка тогуз ракета жана 63 дрон жана 33 жерге дрон сыныгы түшкөн", - деп жазылган маалыматта.
Жергиликтүү бийликтин маалыматына караганда, Киевде кеминде 19 адам жараат алды. Турак жайлар талкаланды.
Баштапкы маалыматтар боюнча украин куралдуу күчтөрү Орусиянын 478 ракета жана дрондорун жок кылган. Анын ичинде 268 Shahed дрону жана эки канаттуу "Искандер-К" ракетасы бар.
Орус армиясы "Шахед" үлгүсүндөгү дрондор менен Украинага бейшембиге караган түнү чабуул койгон. Маалыматка караганда 52 учкучсуз аппараттын 22и атып түшүрүлсө, 18 ар кайсы жерде жок кылынган.
Орусиянын Коргоо министрлиги адатта жарандык жайларга сокку урганын четке кагып, бир гана аскердик объекттерди бутага аларын билдирет.
Орусия Украинага басып кирип, согуш баштаганына 3,5 жылга чукулдап баратат. Согушту токтотуу боюнча дипломатиялык аракеттерден майнап чыга элек.
АКШ президенти Дональд Трамп Путин менен соңку сүйлөшүүдө Украинадагы ок атууну токтотуу боюнча “эч кандай алдыга жылыш” болбогонун билдирди.
Бул тууралуу Кошмо Штаттардын президенти бейшемби күнкү орус президенти Владимир Путин менен телефондон сүйлөшкөндөн кийин журналисттер менен баарлашып жатып билдирди.
Трамп Украинадагы кырдаалга нааразы экенин, АКШ бул өлкөгө көптөгөн курал-жарак бергенин жана муну улантып жатканын кошумчалады. Бирок ал мурдагы президент Жо Байдендин администрациясы Украинага курал-жарак берип атып, АКШнын “казынасын бош калтырганын, эми өзүбүзгө жетерине ишенимдүү болушубуз керек” деп билдирди.
Трамп менен Путин 3-июлда телефондон сүйлөшкөн. Сүйлөшүү дээрлик бир саатка созулганын орус президентинин жардамчысы Юрий Ушаков журналисттерге билдирип, анда эки президент Украинадагы согуш, Ирандын өзөктүк программасы тууралуу сөз кылышканын кошумчалаган.
Трамп менен Путин бир сааттай телефондон сүйлөштү
3-июлда АКШнын лидери Дональд Трамп менен Орусиянын президенти Владимир Путин телефондон сүйлөштү. Бул сүйлөшүү дээрлик бир саатка созулганын орус президентинин жардамчысы Юрий Ушаков журналисттерге билдирди.
Анын айтымында, эки президент Украинадагы согуш, Ирандын өзөктүк программасы тууралуу сөз кылышкан. Орус медиасы бул сүйлөшүүдө Трамп Украинадагы согушту тез арада токтотуу маселесин көтөргөнүн, Путин Кремл бул согушка "негиз берди" деп эсептеген маселелерди кайталаганын жазды.
Ушаков орус президенти америка лидерин Ирандын өзөктүк программасына байланыштуу маселени дипломатиялык жол менен чечүүгө чакырганын, эки лидердин бетме-бет жолугушуусу тууралуу эч кандай чечим болбогонун да кошумчалады.
Азырынча Ак үй Трамп менен Путиндин телефон сүйлөшүүсүнүн чоо-жайы тууралуу маалымат бере элек. Бир нече саат мурда Трамп орус президенти менен сүйлөшөрүн Truth Social түйүнүндөгү баракчасына жазган. Бирок анын максаты тууралуу айткан эмес.
Бул сүйлөшүүдөн кийин АКШ президенти Украинанын лидери Владимир Зеленскийге да телефон чалышы мүмкүндүгүн Reuters жаңылыктар агенттиги жазган.
Трамп экинчи президенттик мөөнөтүнө киришкенден кийин биринчи жолу 12-февралда Путин бир жарым сааттай телефондон сүйлөшкөн. Бул Орусия Украинага басып киргенден бери эки өлкө президенттеринин биринчи түз байланышы болуп калган. Андан бери Трамп менен Путин Украинадагы согуш сыяктуу эл аралык маселелерди бир нече жолу телефон аркылуу талкуулаганы кабарланган.